日本資訊分享

【北海道無料婚紗相秘境

從前有兩個好普通的中學教師,Pin老師與家明Sir。一個鍾意整甜品,一個鍾意去旅行,2008年進入新階段,結婚前完無影過婚紗相。因為好拍比攝影師規定做指定動作,仲要被好多唔識的工作人員圍住,影得勁唔自然。仲有係聽得太多朋友講,晒相時俾人迫揀好多張相,之後執相執到個樣都認唔到,最後仲要掛到一屋都係大油畫架,唔知掉唔掉好。苦。。。

佢地計劃不如用影結婚相的錢,去北海道Honeymoon 同自拍婚紗相。

北海道無料影婚紗相攻略

準備禮服:

結婚時我們都訂做了婚紗及西裝,所以自己帶禮服,一毫子都唔使比。我件婚紗比較特別,裙尾係可拆式,亦可加入不同配件。例如吊帶、腰帶、頭紗、外套。咁就好似換咗好多件衫,其實着嚟着去都係一條白裙。簡單啲嚟講,件婚紗就好似細個玩Barbie公仔條裙咁,明就明。如果冇禮服小貼士:其實女仔買條白長裙,男仔簡單恤衫西褲,真係唔建議嚟到日本先租,因為會好冇彈性,成日記住要還衫,就算見到靚景點,都唔可以即興換衫影相。北海道周圍景色咁靚,白裙恤衫簡簡單單,影出嚟都好靚好有feel。

 

女仔化妝set頭:

其實最好紮起頭髮,會比較乾淨整潔,再插朵頭花。我在100円店買咗兩朵膠花,唔怕凋謝效果OK。化妝豐儉由人,我全部都係去到景點在車上自己化妝,其實影相全部天然光,簡單淡妝影出嚟仲更加自然,張相放10幾年都好襟睇。

 

手花:

一早諗咗要攞薰衣草,去到富良野富田農場,500円一扎有交易,細細扎容易拎。其實背景一街都係花,如果隻手仲攞住咁多花,好似有啲多餘。

 

自拍神器:

 2008年仲未有自拍神棍,我們全程用腳架加遙控,細心D睇相,其實家明隻手成日拎住個遙控,好好笑。16年後嘅今日,應該乜嘢自拍神器都有,唔使擔心。

 

打燈:

呢個比較大問題,我哋所有相全部自拍,冇人幫手打燈或攞反光板,所以唯有用天然光,結果難免塊面有光暗,唯有擺pose就下,所以你見到啲相,成日望住個太陽就係咁解。我就唔係太介意,影10張有一張靚都OK啦,全部都唔使錢㗎喎。

 

交通:

因為要換禮服及化妝,又要放相機當然係要租車啦,我哋一共租咗十幾日車。俾個平價租車方法小貼士你,日本租車日數越長越平,租15-30日價錢,同14日差唔多,所以出發前上租車網站睇清楚,可能租多幾日車仲平。

 

額外支出:

我哋去咗19日,其中有5-6日都有換衫影相,當然喺富良野、美瑛就影得最多。要留意大部份景點都係免費,只有少部份花園要收入場費,都係幾百円左右好平。所以如果你唔係太介意,張張相都要世界大師級,基本上真係完全無料,就影到一輯,獨一無二靚景婚紗相。影相最緊要影得自然開心,同最鍾意嘅人,去到最鍾意嘅地方一齊honeymoon,去到邊都自拍玩吓。就算最後只得一張相滿意,都已經不枉此行。預祝各位準備出發北海道honeymoon 的朋友仔,行程順利,甜甜蜜蜜。

講咗咁耐,你最想知究竟我去咗邊度影相?

北海道無料婚紗相秘境list:

1. 北竜町ひまわりの里portal.hokuryu.info/himawari
3.富良野四季彩之丘www.shikisainooka.jp/
4.富良野富田農場www.farm-tomita.co.jp/east/
6.美瑛市街道道213號
8.帶廣紫竹ガーデン
9.札幌北海道大學

後記:點解要去日本旅居?

生於香港這個奇怪的急速城市,每日面對好多應該唔應該?可以唔可以?啱唔啱?

一出世要努力讀好書,兩文三語是基本,然後升大學,有能力就去外國留學,返嚟搵份好工。最好政府鐵飯碗,醫生律師都唔錯,供完樓就係人生勝利組。然後呢?仲有冇其他選擇?

兩個只鍾意去旅行整蛋糕,平平無奇的中學老師,咁啱在大埔山丘上一間中學相遇,一拍即合辭職發白日夢。如果成世淨係去日本旅居,只教人整蛋糕,又開唔開到飯?

近年香港四分五裂,人人走得就走,唔知將來會點,亦唔識點教兩個仔。可唔可以每日繼續做自己喜歡的事,過自己最想過嘅生活,香港的下一代會唔會,有多一個選擇?夢想多一個可能?

創立好想食咗個富士山囉FB page,其實係好想為每位路過的香港同路人,加多一則日本資訊;加多一點選擇;加多一個可能。回想起2008年在北海道,冇智能手機上網、冇Google Map、冇高級數碼相機都可以免費影到靚相。2024年的今天仲有咩唔可以?外在環境係點唔重要,相信自己就可以。每日一小步,總有一天會由大埔山丘,走到富士山頂。感謝沿途每一個你同行。

 


其他分享